स्टारयुग लाईव्ह : मोरगाव
बालेवाडी या ठिकाणी झालेल्या 14 वर्षीय वयोगटातील गोळा फेक स्पर्धेत मोरगाव ता. बारामती येथील मयुरेश्वर माध्यमिक व उच्च माध्यमिक विद्यालयातील विद्यार्थी सक्षम सचिन यादव यांनी प्रथम क्रमांक पटकावला. यानंतर त्याची विभागीय स्तरावर निवड झाली असून मोरगाव परिसरातील नागरिकांनी त्याच्यावर कौतुकाचा वर्षाव केला आहे.
यापूर्वी बारामती तालुक्यातील माळेगाव येथील क्रीडा संकुलात आयोजित करण्यात आलेल्या गोळा स्पर्धेत सक्षम सचिन यादव याने 64 खेळाडूंमधून प्रथम क्रमांक मिळवला होता. या घवघवीत यशानंतर त्याची जिल्हास्तरीय स्पर्धेसाठी निवड करण्यात आली होती. बालेवाडी क्रीडा संकुल या ठिकाणी नुकतीच जिल्हास्तरीय स्पर्धा पार पडली. या जिल्हास्तरीय स्पर्धेत यादव याने पुन्हा एकदा जिल्हा पातळीवर प्रथम क्रमांक मिळवला आहे.
तालुका व जिल्हास्तरावर दोन्ही ठिकाणी प्रथम क्रमांक मिळवून त्याने यश संपादन केले असून त्याची आता विभागीय स्तरावरील स्पर्धेसाठी निवड झाली आहे. रयत शिक्षण संस्थेच्या मोरगाव येथील श्री मयुरेश्वर माध्यमिक व उच्च माध्यमिक विद्यालयात शिकत असलेला व जिल्हा व तालुका स्तरावर प्रथम क्रमांक पटकावणारा तो एकमेव विद्यार्थी ठरला आहे.
विद्यालयाचे मुख्याध्यापक अर्जुन कोकरे, पर्यवेक्षिका नंदा नाझीरकर, क्रीडा विभाग प्रमुख रमेश शेवते, ज्येष्ठ शिक्षक तुषार माथने, विजय हाडके, प्रवीण आटोळे, अमित आव्हाळे, शिक्षिका आम्रपाली घडवे, नजमा शेख, सारिका तांबे यांनी त्याचे विशेष कौतुक केले. यावेळी सक्षम चे पालक सचिन पांडुरंग यादव यांच्यासह सर्व शिक्षक व विद्यार्थी विद्यार्थिनी मोठ्या संख्येने उपस्थित होते.
